Leikskólar
Það er gaman að heimsækja Þjóðminjasafnið. Safnkennarar gera heimsóknina að uppgötvunarleiðangri og hvetja börnin til að spyrja spurninga og tjá sína upplifun. Mörgum gripum á safninu fylgja ævintýralegar sögur og í heimsókninni er vísað í sögur og minni úr dægurmenningu samtímans til að tengja það sem fyrir augu ber við reynsluheim barnanna.
Viltu bóka heimsókn?
Þjóðminjasafnið - hvað er það?
Safnkennari leiðir hópinn um grunnsýningu safnsins, Þjóð verður til, þar sem ýmsa forvitnilega gripi er að sjá. Styttum og líkneskjum á sýningunni eru gefinn sérstakur gaumur og farið er í leik þar sem hermt er eftir styttunum. Börnin fá að handleika eftirgerð af grip á sýningunni.
Bóka heimsóknDrekar og forynjur
Börnin skoða grunnsýningu safnsins, Þjóð verður til, með safnkennara. Á sýningunni er marga forvitnilega gripi að finna. Sérstakri athygli er beint að drekum og forynjum, sem leynast á óvæntum gripum, og sagðar ævintýralegar sögur af þeim. Börnin fá að handleika eftirgerð af grip á sýningunni.
Bóka heimsókn
Eins og hundur og köttur
Sýningin „Eins og hundur og köttur" fjallar um sambýli fólks og þessara dýra í gegnum aldirnar. Á sýningunni má sjá ljósmyndir sem fanga dýrin í ýmsu samhengi, bein sem hafa fundist við fornleifauppgrefti og alls konar hunda- og kattahluti. Skemmtilegt er svo að skoða kvikmyndabrot sem sýna hunda og ketti í alls konar sambýli við okkur mannfólkið. Í lok heimsóknarinnar býðst nemendum að föndra sinn eigin sprellihund eða -kött; lita hann og klippa út og setja saman. Allt efni er á staðnum en ljúka má við föndrið þegar komið er til baka í skólann ef það hentar betur.
Bóka heimsóknÆvintýrið um brúðarbúninginn
Nú býðst ný fræðsluleið út frá sérsýningunni „Með sögu í farangrinum – Brúðarbúningurinn". Á sýningunni er einhver ríkulegasti brúðarbúningur í sögu landsins. Búningurinn er faldbúningur sem að mestu leyti er frá síðari hluta 18. aldar. Hann var talinn hafa glatast í skipsskaða suður af Íslandi en síðar kom í ljós að búningurinn hafði bjargast og hann fannst í safni í Lundúnum. Auk búningsins og skarts sem honum fylgir eru á sýningunni stórbrotnar og ævintýralegar klippimyndir sem segja sögu búningsins og kvennanna sem bjuggu hann til og báru hann. Safnkennari leiðir skoðun á búningnum og fylgihlutum hans og sest svo með börnunum við klippilistaverkin og segir þeim ævintýrið um brúðarbúninginn um leið og börnin skoða klippimyndirnar vel. Gefinn er tími fyrir börnin að tjá sig um það sem þau uppgötva í listaverkinu. Í lok heimsóknarinnar er boðið upp á klippismiðju þar sem nemendur móta sitt eigið ævintýri úr myndefni af sýningunni. Allt efni er á staðnum en ljúka má við klippimyndina þegar komið er til baka í skólann ef það hentar betur.
Bóka heimsókn
Séróskir
Safnkennarar geta mótað heimsóknir eftir óskum kennara. Hvað er verið að fjalla um í leikskólanum og hvert er áhugasvið barnanna? Ekki hika við að hafa samband! Hægt er að senda fyrirspurn á kennsla@thjodminjasafn.is.
Bóka heimsókn
Leiðarljós safnkennara
Úr Aðalnámsskrá
Safnkennarar taka mið af Aðalnámsskrá leikskóla og hafa þessi leiðarljós í hávegum:
- Leikskóli á að vera félags- og menningarlegur vettvangur þar sem þjóðararfur og gildi íslensks samfélags skipa veglegan sess.
- Starfshættir leikskóla eiga að hvetja börn til að tjá sig og hlusta á frásagnir, sögur, ljóð og ævintýri.
- Leikskóli á að vera samfélag þar sem hver einstaklingur nýtur virðingar og leggur sitt af mörkum.
- Í leikskóla á að byggja á reynsluheimi barna og skapa þeim merkingarbæra reynslu.
.webp)
