Grunnskóli miðstig
Heimsókn í Þjóðminjasafnið er skemmtileg og fræðandi. Markmið safnkennara er að heimsóknin verði uppgötvunarleiðangur fyrir börnin. Þau eru hvött til að spyrja spurninga og tjá sig um það sem fyrir augu ber, sinn hugarheim og lífsviðhorf og hvort þau séu ólík því sem tíðkast hefur í gegnum aldirnar.
Viltu bóka heimsókn?
Almenn leiðsögn um grunnsýninguna Þjóð verður til
Í heimsókninni er lögð áhersla á að nemendur upplifi Þjóðminjasafnið sem áhugaverðan stað til að heimsækja og kynnist þeim fræðslubrunni sem grunnsýning Þjóðminjasafnsins er. Leitast er við að efla samfélagsvitund nemendanna og ýta undir hæfni þeirra til að skilja veruleikann, umhverfið, samfélagið, söguna og menninguna út frá sýningargripum og þeim frásögnum sem þeir geyma.
Bóka heimsóknÍ spor landnámsfólks
Í heimsókninni er fjallað um landnámstímann og fornleifar frá fyrstu öldum Íslandsbyggðar skoðaðar. Nemendur eru hvattir til að spyrja spurninga og tjá sig um sýningargripi, beinagrindur í kumlum og hugarheim landnámsfólks. Umræðuefnin eru margvísleg svo sem helgisiðir og trúarbrögð, heilbrigði, híbýlahættir, tíska, tæknikunnátta og lífsviðurværi. Fjallað er um daglegar athafnir út frá gripum sem þeim tengjast, svo sem hnefatafli, vopnum, silfursjóðum, eldfærum, skarti, vefnaði, mataráhöldum og verkfærum. Börnin kynnast aðferðum fornleifafræðinnar og hvernig draga má ályktanir af rannsóknum. Fræðsluleiðina um landnámið er hægt að tengja við heimsókn á handritasýninguna „Heimur í orðum" í Eddu og „Landnámssýninguna Aðalstræti", en þar er líka boðið upp á fræðslu fyrir sama aldurshóp um landnám Íslands sem kallast vel á við heimsókn í Þjóðminjasafnið.
Bóka heimsókn
Ritöld að prentöld
Í heimsókninni er fjallað um upphaf ritaldar á þjóðveldisöld, sagnaritun og þróun bókagerðar fram yfir siðskipti þegar prentiðnin er innleidd á Íslandi. Heimsóknin er samspil fræðslu safnkennara, samtals og sjálfstæðrar athugunar nemenda á sýningunni. Að heimsókn lokinni hafa nemendur kynnst þjóðfélagsgerð tímabilsins og þróun þess. Þau fræðast um sagnaritun og hlutverk klaustra í menntun og menningu í landinu og áhrif prentsmiðjunnar. Í leiðinni kynnast nemendur höfðingjanum Snorra Sturlusyni og biskupnum Guðbrandi Þorlákssyni sem leiddu bókmenningu Íslendinga, hvor á sínu tímabili.
Bóka heimsóknTrúarlíf og siðaskipti
Þjóðminjasafnið varðveitir marga gripi sem tengjast trúarlífi Íslendinga fyrr á öldum, allt frá heiðni og fram að nútíma. Safnkennari staldrar við slíka gripi en þar á meðal eru Þórslíkneskið og kuml úr heiðni, kirkjuþil og fleiri kirkjugripir úr kaþólskum sið og Guðbrandsbiblía og aðrir munir sem tengjast lúterskunni. Einnig eru skoðaðir munir sem tengjast refsingum og galdraiðkun og rætt um breytingar á trúarlífi í landinu. Nemendur eru hvattir til að spyrja spurninga og tjá sig um hugarheim, lífsviðhorf og siðferði fólks á ólíkum tímum Íslandssögunnar. Að heimsókn lokinni hafa nemendur kynnst hugtökum trúarbragða, svo sem norræn goðafræði, heiðni, kristni, kaþólska, lúterska, helgisiðir og helgirit. Þau hafa kynnst táknum, myndum, skreyti og ýmsum búnaði sem tengist trúarbrögðum. Þau geta staðsett lykilpersónur úr sögunni í tíma og tíðaranda.
Bóka heimsókn
Séróskir - við sníðum heimsókn að ykkar óskum
Hvað er bekkurinn að fást við? Gæti heimsókn í Þjóðminjasafnið bætt einhverju skemmtilegu og nýju við viðfangsefnið? Safnkennarar geta mótað heimsóknir í samvinnu við kennara og tengt hana flestum viðfangsefnum. Gripir safnsins bjóða upp á ótal möguleika. Safnkennarar gefa frekari upplýsingar ef óskað er, sendið tölvupóst á: kennsla@thjodminjasafn.is.
Bóka heimsókn
Leiðarljós safnkennara
Úr Aðalnámsskrá
Menntagildi samfélagsgreina skv. Aðalnámskrá grunnskóla er haft að leiðarljósi í öllum heimsóknum:
- Hæfni nemanda til að skilja veruleikann (umhverfið, samfélagið, söguna og menninguna), sem hann hefur fæðst inn í, byggist á þeirri reynslu sem hann hefur orðið fyrir. Samfélagsgreinar eiga að efla þessa hæfni með því að víkka út og dýpka reynsluheim nemandans.
- Hæfni nemanda til að átta sig á sjálfum sér byggist á því hvaða mynd hann gerir sér af sjálfum sér (og öðrum) í eigin huga. Samfélagsgreinar eiga að efla þessa hæfni með því að víkka út og dýpka hugarheim nemandans.
- Hæfni nemanda til að mynda og þróa tengsl sín við aðra byggist á þeim félagsskap sem hann hefur tekið þátt í. Samfélagsgreinar eiga að efla þessa hæfni með því að virkja nemandann til þátttöku í félagsheimi sínum, þeim gildum og reglum sem þar ríkja. (Bls. 195)
Færi gefst á að þjálfa m.a. eftirfarandi hæfniviðmiðsamfélagsgreinaskv. Aðalnámskrá í heimsókninni:
Að nemandi geti:
- skýrt tengsl samfélags, náttúru, trúar og lífsviðhorfa fyrr og nú
- gert grein fyrir einkennum og stöðu Íslands í heiminum í ljósi legu og sögu landsins, breytilegrar menningar, trúar og lífsviðhorfa
- lýst einkennum og þróun íslensks þjóðfélags og tekið dæmi um mikilvæga áhrifaþætti
- rætt viðfangsefni sem snerta trú, lífsviðhorf og siðferði og sett í samhengi við atburði daglegs lífs
- greint hvernig sagan birtist í textum og munum, hefðum og minningum
- áttað sig á hvernig loftslag og gróðurfar hafa áhrif á búsetu og lífsskilyrði
- sett sig í spor fólks með ólíkan bakgrunn á völdum stöðum og tímum (bls. 198 – 203).
.webp)
