Barnasmiðja í vetrarfríi: Mynstur og myndlistarsveifla
Velkomin í Þjóðminjasafnið í vetrarfríinu!
Sunnudaginn 23. febrúar verður barnasmiðja hjá okkur. Í smiðjunni munum við rannsaka mynstrin á sýningargripunum í Þjóðminjasafninu með því að teikna þau.
Við veltum fyrir okkur spurningum eins og: Hvað er mynstur? Hvernig urðu þau til? Og hvað merkja þau? Við rýnum í það hvernig mynstur hafa breyst í tímans rás og hvernig þau hafa verið notuð til þess að skreyta og fegra. Við skoðum hvernig mynstur getur verið hreyfing eða endurtekning, líka úti í náttúrunni. Svo er líka hægt að rannsaka mynstrið á vettlingunum okkar eða á sokkunum eða hjá Línu Langsokk.
Vilborg Bjarkadóttir myndlistarkona tekur á móti krökkunum og skoðar með þeim gripi, spjallar, afhendir teikniáhöld og leiðbeinir. Allt efni verður á staðnum.
Við hlökkum til að sjá ykku í Þjóðminjasafninu í vetrarfríinu. Á Þjóðminjasafninu er alltaf eitthvað nýtt að sjá - þess vegna koma sömu gestirnir aftur og aftur.
Safnabingó og ratleiki er hægt að nálgast í móttöku til að gera heimsóknina enn skemmtilegri.
Opið á kaffihúsinu.
Börn fá frítt inn á Þjóðminjasafnið. Miði fyrir fullorðna kostar 3.000 kr. og gildir í ár frá kaupum.
