Íslenskir gripir á söfnum í Bretlandi
Þriðjudaginn 1. mars kl. 12 mun Guðrún Sveinbjarnardóttir fornleifafræðingur, fjalla um íslenska gripi í söfnum í Bretlandi. Fyrirlesturinn fer fram í fyrirlestrasal safnsins og í beinu streymi á YouTube rás safnsins.
Áhugi á söfnun og stofnun safna í Bretlandi um og uppúr miðri 19. öld hefur sterk tengsl við þjóðernisvakninguna sem ríkti í Evrópu á þessum tíma, og jókst í kjölfar iðnbyltingarinnar, þegar handverk fór að víkja fyrir vélvæðingu. Þessi þróun leiddi til meiri áhuga á að endurreisa og safna handverki bændasamfélagsins, en slíkar hugmyndir voru m.a. grundvöllur listiðnaðarhreyfingarinnar (The Arts and Crafts Movement) í Bretlandi. Nytjahlutir sem tilheyrðu íslenska bændasamfélaginu, aðallega á 18. og 19. öld, féllu vel að þessum hugmyndum og nokkur fjöldi þeirra barst breskum söfnum eftir ýmsum leiðum.
Í þessum fyrirlestri verður kynnt verkefni sem hefur það markmið að hafa uppá og skrá muni af íslenskum uppruna sem hafa lent á söfnum í Bretlandseyjum, að kanna tildrög þess að þeir lentu þar og hver afdrif þeirra hafa orðið á söfnunum. Einnig er leitast við að komast að því hverjir það voru sem útveguðu gripina. Alls hafa fundist heimildir um hátt í 500 gripi á 13 söfnum víðsvegar í Englandi og Skotlandi. Gefin verða nokkur dæmi um þessa gripi og þá sem útveguðu söfnunum þá.
Aðgöngumiði í safnið gildir. Ókeypis fyrir handhafa árskorts og ókeypis fyrir börn að 18 ára aldri. Árskort kostar 2.500 kr. og gildir á allar sýningar og viðburði í Þjóðminjasafni Íslands.
Verið öll velkomin.
Ljósmynd af horni: Íslenskt drykkjarhorn frá miðri 17. öld í Wallace Collection í London.
Guðrún Sveinbjarnardóttir, fornleifafræðingur.